CEBU, Philippines - Ang mga pampublikong tunghaan sa elementarya ug high school sa dakbayan sa Talisay andam nga magtukod og vegetable garden aron masulbad ang problema sa malnutrition.
Kini human hangopa sa konseho sa dakbayan sa Talisay ang programa sa Department of Education (DepEd) bahin sa pagpalabong og mga utanon sa eskuylahan aron pagsulbad sa problema sa malnutrition.
Gumikan niini ang konseho sa maong dakbayan mipasar og usa ka resolusyon nga kun mapirmahan ni Mayor Socrates Fernandez ipa-implementar dayon sa mga pampublikong tunghaan sa elementarya ug high school ang paggama og vegetable garden sa matag tulunghaan.
Ang lakang sa konseho maoy usa sa solusyon sa problema sa mga estudyante bahin sa kakuwang sa hustong pagkaon nga maoy hinungdan sa kaluya sa ilang performance sa eskuylahan.
Ang resolusyon sa konseho giduyog nila sa proyekto sa DepEd ug sa Department of Agriculture nga naghiusa sa paglusad sa proyektong “Gulayan sa Paaralan”.
Nasayran nga sa pagkakaron may 1.8 ka milyon ka mga estudyante nga gikan sa 6,000 ka mga pampublikong elementarya ug high school nga tunghaan sa tibuok nasud nga mihangop sa nahisgutang proyekto.
Si Kalihim Armin Luistro sa DepEd mipasabot nga ang proyekto magpadayon hangtud nga ang mga estudyante makakat-on sa pagkaon og mga prutas ug utan.
Nasayran usab nga sa mga taga Southeast Asia, ang Pilipinas maoy labing menus og konsumo sa utan o labing hinay nga mokaon og utan. Sa report sa Food and Nutrition Research Council , gibutyag nga 26 sa 100 ka mga batang Pilipino nga nagpanuigon gikan sa unom ka tuig ngadto sa 10-anyos ang kuwang sa timbang sa ilang pangidaron.
Sa tuig 2008 ang dakbayan sa Talisay nahilista sa record sa National Nutrition Council nga maoy labing daghan og mga kabataang wala pa magtungha nga kuwang kaayo sa pagkaon sa tibuok rehiyon. (BANAT NEWS)