CEBU, Philippines - Ang National Bureau of Investigation (NBI) 7 ug Mandaue City Police Office (MCPO) nagtambayayong sa pagsulbad sa kasong pagbanhig patay sa magpapatigayong Antonio Ouano sa milabay’ng semana.
Si NBI 7 Regional Director Edward Villarta mibutyag nga ang pamilya sa biktima midangop kanila sa milabay’ng adlaw sa tinguha nga madali ang pagtumbok sa mga kriminal.
Si Ouano didto pusila sa eskina duol sa Cebu International Convention Center (CICC) sa dakbayan sa Mandaue.
Si Villarta nakiglambigit na karon sa kapolisan sa MCPO alang sa hiniusang operasyon sa pagkaplag sa mga killer.
Samtang si MCPO Director Sr. Supt. Noel Gillamac mihangop sa pakig-alayon sa NBI 7 kay alang kaniya nga mas maayo nga daghan ang molihok aron matumbok dayon ang mga kriminal.
Hinuon wala mobutyag ang mga pangulo sa duha ka ahensiya kung kinsa ang manguna sa ilang hiniusang operasyon.
Si Supt. James Gofort sa MCPO kinsa maoy nangulo sa Task Force Ouano nagtuo nga pinaagi sa gipagawas nilang cartographic sketch nga kamay-ong sa duha ka kriminal nga nagsakay og motorsiklo nga maoy mipatay kang Ouano, may makahatag kanila ug impormasyon alang sa kasulbaran sa maong krimen. - WC (BANAT NEWS)