CEBU, Philippines - Upat ka drayber namatud-ang positibo sa paggamit og gidili nga drugas atol sa usa ka surprise drug test nga gilusad sa Land Transportation Office (LTO) 7 didto sa dalan N.Bacalso Avenue, ning syudad sa Sugbo kagahapon.
Ang maong mga drayber, kansang mga ngalan gipugngan sa taga LTO, duha nagmaneho og taxi, samtang laing duha ang nagmaneho og bus.
Sa iyang pamahayag sa TV Patrol Central Visayas, si LTO-7 Regional Director Raul Aguilos mipahibalo nga magpadayon sila sa pagpahigayon og surprise drug testing aron malimpyo ang kadalanan gikan sa mga drayber nga tigamitan og illegal nga drugas.
Hinuon, matud pa niya nga ang resulta sa maong drug test sa upat ka drayber ipaagi pa og usa ka confirmatory drug test aron matino kun angay ba gyud nga silotan ang maong mga drayber.
Sa pagkakaron aduna nay 20 ka mga drayber dinhi sa Sugbo ang nasakpang positibo nga tigamitan og drugas ug silang tanan gipahamtangan na og silot pinaagi sa pag-revoke sa ilang mga lisensya. (WC)(BANAT NEWS)