CEBU, Philippines - Gibasura sa korte ang kasong robbery batok sa kontrobersiyal nga sinagop ni Mayor Socrates Fernandez nga si Joavan Fernandez human nga ang mga witness sa prosekusyon napakyas sa pagtungha sa husay sa kaso.
Si Regional Trial Court (RTC) Judge Gilbert Moises sa Branch 8 mimando sa pagbasura sa nahisgutang kaso batok kang Joavan tungod sa pagkapakyas sa mga witness sa prosekusyon sa pagpakita sa gipahigayong hearing niadtong Hulyo 20, 2011.
Si Public prosecutor William Canta mitawag sa duha ka mga witness nga sila si Felix Pardillo ug Darwin Homicillo diha sa korte apan walay bisan usa ang nitunga. Si Canta mipasabot ngadto sa korte nga wala gyud niya makita ang mga witness. Ang abogado ni Joavan nga si George Bragat abtik usab nga miawhag sa korte nga ipabasura ang kaso sa iyang kliyente tungod sa kapakyas og tungha sa mga witness.
“I moved for the dismissal of the case invoking the constitutional right of the accused for the speedy trial,” ni Bragat pa.
Si Moises mi-ruled sa objection sa public prosecutor pagkonsiderar nga ang akusado kinahanglang mopahimulos sa iyang katungod alang sa dinaliang trial sa kaso hinungdan nga giaprobahan niini ang motion to dismiss sa kampo ni Joavan.
Kahinumduman nga ang tindero sa Club House sa Vista Grande Subdivision sa barangay Bulacao, Talisay nga si Raymund Paran, 19, miduso og affidavit of desistance tungod kay wala na kini interesado nga mapadayon pa ang iyang kasong gisang-at sa korte batok kang Joavan.
Sa arraignment sa kaso niadtong Marso 16, 2011 si Joavan mi-plead not guilty.
Kahinumduman usab nga niadtong Disyembre 15, 2010 si Paran mipasaka og kasong robbery batok kang Joavan tungod sa giingong pagkuha sa sinagop sa Mayor og duha ka litrong softdrinks nga wala bayari. - BANAT NEWS