CEBU, Philippines - Mogahin og P10 milyones si Mayor Michael Rama alang sa pagpaangay og livelihood program sa mga pamilyang apektado sa mga ipatumang demolisyon sa siyudad sama diha sa mga pamilya sa Mahiga Creek.
Gibutyag ni Mayor Rama atol sa interbyu sa DyDD gisukip karun niya ang P10 milyones nga inisyal nga pundo sa supplemental budget sa siyudad aron ka-aprobahan sa konseho.
Nunot niini gitahasan na ni Rama ang assistant chief sa Department of Manpower Development and Placement (DMDP) nga si Susana Ardoza, ug ang hepe sa Department of Social Welfare and Services (DSWS) Cathy Yso, ug magpatabang usab ang dakbayan sa Department of Trade and Industry (DTI) ug ang Department of Labor and Employment (DOLE)7 alang sa maong katuyoan.
Kini mao unya’y mohashas ug mopaangay sa mga livelihood program sa mga benepisyaryo human ma-apektuhan sa gipatumang demolisyon sa dakbayan.
Ang Department for the Welfare of the Urban Poor pinangulohan ni Russel Collin maoy mo-screen sa mga benepisyaryo nga makapahimulos sa maong proyekto.
Subling gitataw sa mayor nga dili tinuod ang mga nigawas nga pasangil nga iyaha lang gipasagdan ang mga pamilya nga biktima sa demolisyon ilabi na ang taga Mahiga Creek.
Ang mga apektadong pamilya mipasangil nga gipasagdan lang sila sa siyudad ug walay gihatag nga relocation site ingon man hinabang pinansiyal. Butang nga gipanghimakak sa mayor sanglit adunay relocation site nga gipaangay ang siyudad sa mga maapektuhang pamilya sa demolisyon. - BANAT NEWS