CEBU, Philippines - Usa ka wala mailhing lalaki ang napalgang patay nga gidudahang gi-salvage sulod sa gamay’ng payag ug gilabay sa kalibonan sa utlanan sa barangay Valencia ug Compostela sa lungsod sa Alegria.
Ang biktima gibana-bana sa kapulisan nga nagpangidaron 20 ngadto sa 30-anyos dunay gitas-on 5’6” ngadto sa 5’7” taason og buhok, kasarangan ang pamanit, nagsul-ob green jacket ug kolor brown cargo shorts.
Si SPO1 Renato Abellar sa Alegria Police station sa pakighinabi sa Banat News nagkanayon ang biktima nakaangkon og upat ka samad pinusilan sa bagtak, bukobuko, paa ug sa iyang alimpulo nga maoy nakaingon sa hinanali niining kamatayon.
Wala say nakit-ang kabhang sa bala ang kapulisan sa crime scene. Usa ka Ronnie Lastimoso, molupyo sa maong lugar maoy nakakaplag sa patay’ng lawas dihang nagtugway kini sa iyang kanding pasado alas-9 kagahapon sa buntag.
Matud ni Abellar dunay gamay nga payag daplin sa barangay road ug napulo ngadto sa 15 metros ang distansya sa ubos nga bahin diin nakit-an ang patay’ng lawas sa biktima.
Si Dr. Samson Dela Peña, municipal health officer sa lungsod miingon nga gipatay ang biktima nianang ala-una ngadto sa alas-2 sa kaadlawon.
Nagtuo ang kapulisan nga gi-salvage ang biktima sanglit walay nakaila nga mga residente sa dapit. (BANAT NEWS)