CEBU, Philippines - Nakigtagbo sa miaging adlaw kang Governor Gwendolyn Garcia ang mga miyembro sa Mandaue Beautification Committee aron mapatuman usab ang proyekto nga magpanindot sa kadalanan sa Mandaue.
Kini may labot sa pagpangandam sa kagamhanan sa lalawigan pagsugat sa mga delegado nga mosalmot sa East Asian Inter-Regional Tourism Forum kun EATOF nga alagaron sa lalawigan sa Sugbo.
Ang Pasigarbo sa Sugbo ug One Cebu Expo gitakdang ipahigayon sa Cebu International Convention Center (CICC) sa siyudad sa Mandaue karong umaabot nga bulan sa Agosto.
Ang grupo sa mga miadto sa buhatan sa gobernador gipangulohan sa asawa ni Mandaue City Mayor Jonas Cortes, nga si Sarah Cortes.
Si Gobernador Garcia mitumbok nga angayan nga paninduton ang pipila ka mga kadalanan sa dakbayan sa Mandaue pinaagi sa pagpatuman sa ilang gisugyot nga landscape sa ubos nga bahin sa Subangdaku ug sa flyover sa Maguikay.
Lakip usab nga patahumon sa Mandaue Beautification Committee mao ang kadalanan sa AC Cortes Avenue sanglit mao man kini ang agian sa mga sakyanan sa mga delegado sa EATOF.
Ang gobernador nagkanayon nga ang probinsiya makigtambayayong sa siyudad sa Mandaue alang sa kalamposan sa maong proyekto.
Lakip usab nga nahisgutan sa gobernador ug sa mga bisita niining taga Mandaue mao ang pagpalapad sa anti-graffiti campaign nga gihingusgan karon sa kagamhanan sa lalawigan sa Sugbo. - BANAT NEWS