CEBU, Philippines - Gitumbok sa buhatan ni 6th district Congressman Gabriel Luis Luigi Quisumbing nga usa sa posibling lakang nga himuon niini bahin sa kontrobersiya sa medical assistance program sa kongresista alang sa Eversley Child Sanitarium Hospital (ECSH) mao nga dili bayran ang kapin sa P2.2 milyones nga balor sa mga tambal nga napagawas gikan sa maong tambalanan pinaagi sa paggamit og dili tinuod nga mga ngalan sa pasyente.
Sumala pa ni manlalaban Joselia Bighani, chief of staff ni Kongresista Quisumbing nga sa gipahigayon nilang fact finding investigation kauban ang mga opisyales sa Department of Health (DOH), ilang natataw nga nanghinubra ang gi-release nga mga tambal ngadto sa walay klarong pasyente.
Sanglit kwestiyonable man ang pagpagawas sa maong mga tambal, hayan dili usab mubayad ang buhatan ni Kongresista Quisumbing sa maong kantidad.
Gitataw usab ni Bighani nga kun gikinahanglan, ang buhatan ni Quisumbing maoy mangunay sa pagpasaka og tukmang kaso batok sa mga opisyal sa ECSH nga mamatud-ang nalambigit sa maong anomaliya.
Kini kun dili pa igo ang pagahimuong legal nga aksyon sa DOH batok sa mga tawo nga nakahimo sa maong salaod, matud pa ni Bighani. - BANAT NEWS