CEBU, Philippines - Nagtinguha si 6th district Congressman Gabriel Luis Luigi Quisumbing nga mopahigayon og congressional inquiry bahin sa pagkuyanap sa cybersex sa lungsod sa Cordova aron kahatagan og dinaliang aksyon sa gobiyerno ang gihimo sa ubang mga ginikanan nga mao nay nagsilbing bugaw sa ilang mga menor de edad nga anak pinaagi sa cybersex.
Si Quisumbing nga maoy nagsakop sa lungsod sa Cordova isip bahin sa ika-unom nga distrito nagkanayon nga makapabalaka na kaayo ang gidaghanon sa mga naronda nga mga cybersex den sa maong lungsod nga misangpot sa pag-rescue sa mga menor de edad ug pagkasikop sa mga nagpaluyo niining maong matang sa pornograpiya.
Matud pa ni Quisumbing nga ang iyang buhatan nakapanday na og resolusyon sa ubos balay balaoranan alang sa pagpahigayon og congressional inquiry kalabot niining nagkagrabi nga pagsiaw sa cybersex ug posibling masang-at kini sa sunod nga semana.
Midugang si Quisumbing nga ang katuyoan sa maong congressional inquiry in aid of legislation mao nga kaprotektahan sa gobiyerno ang kainosenti sa kabataan ug makahimo dayon kini og action plan aron maaresto usab ang mga mapahimuslanon sa mga kabataan ug mga kababayen-an.
Buot usab masayran ni Quisumbing sa mao unya nga congressional inquiry ang tinubdan ug nagpaluyo sa cybersex pornography dinhi sa nasud aron mataral usab sa hukmanan sa ingon hingpit gyud nga masumpo ang nahisgutang immoral nga patigayon.
Dugang pa ni Quisumbing nga dili madawat ang rason sa tumang kawad-on nga maoy nagtukmod sa mga ginikanan sa mga kabataan nga ilawog ang ilang kaugalingong mga anak sa cybersex tungod kay daghan na mang mga programa ang gobiyerno nga gilusad alang sa pagwagtang sa kawad-on sa mga tawo sama sa iyang livelihood program ug ingon man usab scholarship program.
Alang kang Quisumbing nga kun isog man ang ubang mga ginikanan sa pagbanlod ngadto sa pagkalata sa moral sa mga anak niini, nagpasabot lang nga wala pay nakapitol kanilang balaod busa kinahanglang patilawon sila sa kamot sa balaod aron masuta kun asa kutob ang ilang kaisog. (WC) (BANAT NEWS)