CEBU, Philippines - Temporaryong gipaundang ni Lapulapu City Mayor Paz Radaza ang operasyon sa pagpangubkob og Mactan stone sa barangay Babag sa maong siyudad.
Matud pa ni Radaza nga iyang gihulat ang resulta sa pakisusi sa mga sakop sa Mines Geo-Sciences Bureau (MGB) kung luwas pa ba sa piligro ang mga lugar nga maoy gikuhaan sa maong mga Mactan stone.
Sa milabay’ng gabii ang mga sakop sa Task Force Kalikasan nga gipangulohan ni PO3 Jomar Ybanez nakasakmit og usa ka trak nga puno sa Mactan stone.
Kini sa dihang si Adelie Cardenas, ang tag-iya sa Madeca Stones napakyas sa pagpakita og mga dukomento nga legal ang iyang kargamento.
Matud pa ni PO3 Ybanez nga ang mga dokumento nga ilang gipangita mao ang permit to transport ug permit of origin maong kargamento apan wala makapakita si Cardenas niini.
Samtang ang mga molupyo usab sa Barangay Babag nga maoy sentro sa kinubkobay sa Mactan Stone gibati na og kabalaka gumikan kay lawom na kaayo ang dapit nga gikubkoban sa maong mga mahalong bato.
Matud pa sa mayor nga samtang di pa siya makadawat og pamahayag sa taga MGB, ipahunong una niya ang kinubkobay sa Mactan stone aron kalikayan ang kabalaka nga may kinabuhing makalas niining nagkalawom nga lungag sa dapit nga kubkobanan sa maong mga butang. (BANAT NEWS)