CEBU, Philippines - Patay ang 50-anyos nga ginang ug naangol ang anak niining nagmaneho sa motorsiklo ingon man ang kapin sa tuig nga apo niini human malamba ang gisakyan nilang motorsiklo sa highway didto sa barangay Manyo lungsod sa San Remigio niadtong Miyerkules sa alas 3:15 sa hapon.
Ang biktima nga patay nang nadangat sa tambalanan mao si Eloisa Larino, 50, taga lungsod sa Aloguinsan, samtang ang mga naangol mao ang drayber sa motorsiklo nga si Ruben Punay, 24, taga barangay Dos Tuburan ug kapin sa tuig nga anak niini nga si John Marion Punay.
Matud ni PO3 Wilfredo Bonado sa San Remigio Police dihang nahinabi sa Banat News subay sa imbestigasyon ang mga biktima gikan sa lungsod sa Daanbantayan paingon na unta nga manguli sa lungsod sa Tuburan.
Apan samtang nagdagan ang motorsiklo natapig-as sa libaong nga karsada ang ligid niini hinungdan nga nawad-an sa balanse ug natumba.
Si Larino nga naggakos sa bata maayong pagbundak sa ulo sa semento ingon man nalamba usab ang drayber ug bata apan nakaangkon lang kini og mga gagmay’ng pangos ug samad. Apan si Larino nga nakuyapan gidali pagdala sa Don Severo Verallo District Hospital apan namatay.(EIM) (BANAT NEWS)