CEBU, Philippines - Giunay og lugos sa kaugalingong amahan ang usa ka 14-anyos nga dalagita samtang wala ang iyang asawa nga nagtrabaho sa dakbayan sa Sugbu dihang sila lang ang nabilin sa ilang balay sa usa sa mga barangay sa lungsod sa Barili.
Matud pa ni PO3 Estelliore Cañete sa Women’s Desk sa Barili Police Station dihang nahinabi sa Banat News ang biktima kauban sa iyang mga manghod nga 8-anyos ug usa ka kapin sa tuig nga igsuon nangatulog niadtong Hulyo 3 samtang wala ang ilang inahang nagtrabaho sa siyudad.
Matud pa sa biktima nianang pagkagabii samtang nahinanok na siya ug mga manghod gikamang kini sa iyang amahan ug gilugos. Usa ka nagpakabanang silingan nga nakahibawo sa nahitabo mao nay misumbong sa mga awtoridad niadtong petsa 7 adlaw’ng Huwebes.
Ang kapolisan ug social workers mao nay miadto sa tunghaan sa biktima ug kini gipakigkitaan ug diha giangkon sa biktima ang pag-abuso sa amahan kaniya. Kasong pagpanglugos ang gipasaka sa kapolisan batok sa suspek samtang gikostudiya sa social workers ang managsuon.Gipaabot nalang ang warrant of arrest batok niini. (BANAT NEWS)