CEBU, Philippines - Gituohan nga tungod sa gihambing sakit nga kanser sa atay ang hinungdan sa paghikog sa usa ka 60-anyos nga lalaki niadtong Miyerkules sa hapon diha sa ilang balay sa Kalye Bagdok, sitio Kasiba, Cansojong, dakbayan sa Talisay.
Ang naghikog giila sa mga polis nga si Eugenio Lerio, residente sa maong dapit kinsa napalgang nagbitay sa ilang kusina nga ang liog adunay higot nga panapton ug ang pikas tumoy gihikot ngadto sa paros sa kisame sa balay.
Base sa imbestigasyon sa kapolisan nga ang asawa ni Lerio nga si Anita mibutyag nga tulo ka buwan nang nag-antos sa sakit nga kanser sa atay ug gituohan nilang mao kini hinungdan sa paghikog ni Lerio. Natulog nianang tungura si Anita dihang gipukaw sa usa sa mga kabanay ug gipahibalo sa nahitabo sa iyang bana.
Si Lerio giingong mipiko sa mga tuhod niini aron mabitay siya ug matuok ang iyang liog. (BANAT NEWS)