CEBU, Philippines - Napalgang patay nga naglutaw sa dagat ilawom nga bahin sa Marcelo Fernan Bridge sa habig sa barangay Pusok, dakbayan sa Lapulapu ang wala hiilhing lalaki nga gituohang naligo ug nalumos alas-3 pasado ang takna sa miaging hapon.
Si PO2 John Carlo Jocotan sa Homicide Section sa kapolisan sa maong dakbayan miingon nga ang pipila ka molupyo sa maong dapit miingon nga ang wala hiilhing lalaki ilang namatikdan nga naglakawlakaw pa sa ilawom sa Marcelo Fernan Bridge alas- 2 pasado ang takna sa hapon sa maong adlaw.
Pipila ka gutlo ang nakalabay kalit kining naghubo sa gisul-ob nga purol ug miambak sa dagat sa Mactan Channel ug naglangoylangoy apan taud-taod mitidlom na kini ug wala na molutaw pa hinungdan nga daling gipahibalo sa mga tawo ang awtoridad.
Nakuha usab sa CCTV camera sa maong taytayan ang pag-ambak sa maong lalaki.
Gilusad dayon ang pagpangita sa maong lalaki apan dihang naugkat sa mga frogmen sa Philippine Coast Guard patay na kini pag-abot sa Lapulapu District Hospital.
Ang patay’ng lawas nagsul-ob og yellow nga t-shirt ug gidala sa Rolling Hills sa dakbayan sa Mandaue ug ilang gipaabot ang mga kabanay nga mobisita alang sa pag-ila niini. (BANAT NEWS)