CEBU, Philippines - Nagpositibo sa gipahigayong confirmatory test didto sa ulohang buhatan sa Land Transportation Office (LTO) ang katorse ka mga drayber sa pampublikong sakyanan nga una nang nagpositibo atol sa gipahigayung kinalit nga roadside drug test sa mga kadalanan dinhi sa dakbayan sa Sugbo niadtong milabay’ng bulan.
Gipahibalo ni LTO-7 Regional Director Raul Aguilus nga nadawat na nila ang kopya sa resulta sa confirmatory test ug nagpositibo gyud ang urine sample sa 14 sa paggamit og ginadiling drugas.
Hinuon matud ni Aguilus daan nang gi-revoke ang lisensiya sa maong 14 ka mga drayber nga gilangkoban sa mga jeepney, taxi ug bus driver ug dili na tugutang makapamasahero pa.
Matud sa direktor sulod sa unom ka bulan una pa tugutang makalukat og balik og bag-ong lisensiya ang mga nagpositibong drayber apan gikinahanglan nga mopaubos una sila og drug rehabilitation program. (BANAT NEWS)