CEBU, Philippines - Gitakda na sa Department of Interior and Local Government ang pagpadayun sa husay sa kasong gipasaka ni anhing Bise-Gob. Gregorio Sanchez, Jr. batok ni Gob. Gwendolyn Garcia karong Hulyo 25 hangtud sa 28.
Kini subay sa pahibalo ni DILG Legal Services Director Jesus Doque IV ngadto sa anak ni Sanchez nga si Engr. Grecilda Zaballero. Apan ang kampo ni Garcia mohangyo sa DILG nga i-oktaba ang husay sanglit ang abogado nga anak niini nga si Ma. Esperanza Christina Garcia Codilla-Frasco atoa sa gawas sa nasud sa maong mga petsa.
Matud pa sa kaubang abogado, Rory Jon Sepulveda nga sa niaging husay niadtong Hunyo 9, gipadayag nang daan ni Frasco nga wala siya sa nasud sa Hulyo 20 hangtud sa 29. Nahunong ang husay sa kaso human mihangyo si Zaballero kang DILG Investigation Officer Ranny Spencer-Palisok nga mangita pa siya og laing abogado human niya taktaka sa serbisyo si Atty. Oliveros Kintanar.
May abogado na si Zaballero nga sila si Joseph Randi Torregosa, Waldemar Gravador ug Reynato Galeon nga maoy mokupot sa kasong pagpanaw sa gahum batok ni Garcia. Laing abogado nga apil sa grupo mao si Myrna Limbaga kinsa nakauban usa ka higayun kang Kintanar sa niaging husay. - BANAT NEWS