CEBU, Philippines - Ang konseho sa dakbayan sa Sugbo miumol og usa ka resolusyon nga nag-awhag sa Senado nga ipadali ang paglig-on sa Senate Bill (SB) 2644 nga nagmando nga kinahanglang marehistro gyud ang mga tawo nga mopalit og SIM card aron malikayan ang mga krimen.
Si Konsehal Edgardo Labella nga maoy nangamahan sa maong resolusyon nagkanayon nga dako kaayo og ikatabang ang maong balaodnon nga gipangamahanan ni Senador Manuel Villar kay dali rang madakpan ang mga tawong dautan nga mohimo og mga binuang pinaagi sa mensahe sa text sa cellphone.
Kay sa balaodnon ni Villar gihimong unang pangayoan ang usa ka pumapalit og SIM card sa iyang balido nga identification card sama sa SSS ug GSIS ID, voter’s ID ug uban pang personal nga dokumento niini.
Alang kang Labella nga karong panahona ang mga kriminal may bag-o na usab nga paagi sa paglingla sa mga tawo aron mabiktima sa ilang mga binuang pinaagi sa pagpadala og mensahe sa pangilad ngadto sa ilang biktimahonon.
Pipila niini, matud pa ni Labella mao ang nabaniog na kaayong mensahe sa text nga nagpahibawo sa ilaronong tawo nga nakadaog siya sa usa ka contest unya pangayoan dayon og kuwarta aron makuha niya ang iyang premyo, ug daghan na kaayong nabiktima niini.
Ang uban gamiton sa pagpanghulga, o kaha sa pagpangilkil og kuwarta apan malisod kaayo silang mailhan kay dali man kaayong ikasalibay ang ilang SIM card nga gigamit sa maong mga binuang,
Gumikan niini ang konseho sa dakbayan sa Sugbo miawhag sa National Telecommunications Commission (NTC) nga samtang wala pa kaaprobahe ang SB 2644, kinahanglang mohimo kini og aksyon sa maong problema ug dasigon ang mga kompaniya sa telecommunication nga magbaton og kaugalingon nilang data base aron may record sila sa mga tawong mamalit sa ilang SIM card aron pagsiguro nga luwas ang ilang konsumedor gikan sa mga dautang elemento.(WC) (BANAT NEWS)