CEBU, Philippines - Gitakdang imbistigahon sa mga sakop sa hunta probinsiyal nga gipangulohan ni Vice Governor Agnes Magpale ang gikatahong Land Tax Scam didto sa lungsod sa Balamban.
Kini ang gitug-an ni Magpale sa mga tigbalita kinsa nagkanayon nga dako kaayo og kalabtanan ang mga magbabalaod sa lalawigan kalabot sa maong anomaliya.
Kini tungod kay ang lungsod sa Balamban nabaniog karon nga tinubdan sa gipangluwat nga resibo sa buhis nga mini pinaagi sa buhatan sa assessor sa maong lungsod.
Hinuon wala pa matino kung ang tibuok hunta probinsiyal ba ang mopahigayon sa maong imbistigasyon o ang komitiba ra sa maong hunta maoy mousisa niini.
Nunot niini gikatakdang ipatawag usab sa bise gobernador ang Provincial Assessor’s Office aron usab makahatag og ayuda unya sa ilusad nga imbistigasyon aron kapandayan og balaod nga magpakgang sa susamang kahiwian aron dili na masubli pa ang maong anomaliya.
Nasayran nga si Tita Yray, hepe sa Municipal Assessor’s Office sa lungsod sa Balamban ug laing duha niini ka kawani nga sila si Sharee Melgar ug Lucelle Agua ang gireklamo sa Ombudsman Visayas gumikan sa giingong pagtayupe sa mga resibo nga gibayad sa mga magbubuhis sa lungsod sa Balamban.
Silang tulo ang dugokan karon sa maong isyu ug gituohan nga kahatagan kini og tukmang lakang sa kagamhanan sa lalawigan. (BANAT NEWS)