CEBU, Philippines - Gipasigarbo ni Lapulapu City Mayor Paz Radaza ang Hoopsdome sa barangay Gun-ob ug andam na sa mga dagkong kalihukan ug sa patigayon.
Ang maong dome sa milabay’ng Sabado pa sa buntag gisubhan ug pormal nga giablihan atol sa konsiyerto ni Boxing Peoples Champion ug Sarangani Representative Cong. Manny “The Pacman” Pacquiao sa milabay’ng gabii sa susamang adlaw.
Nagsugwak ang katawhan sulod sa Hoopsdome nga adunay kapasidad nga 6 mil ka tawo atol sa konsiyerto ni Pacman.
Matud pa ni Radaza angayang ipasigarbo ngadto sa tibuok kalibutan ang katumanan sa damgo sa mga Oponganons nga makaangkon og moderno ug dakong lugar nga kahatagan og dapit sa mga kalihukan gikan sa paugnat sa kusog, concert ug uban pang okasyon.
Ang maong edipisyo maoy katapusang gasa ni Cong. Arturo “Boy” Radaza sa dihang mayor pa kini sa dakbayan sa Lapulapu.
Tungod sa kamoderno ug airconditioned nga dome giingong naglaraw si Pacquiao nga anha mohimo sa usa sa iyang mga show sa GMA 7 nga “Manny Many Prizes” aron makahatag usab siya og kahigayonan sa mga Oponganons ug Sugbuanon nga makadaog og house and lot ug minilyon ka pesos gikan sa iyang kinitaan sa pamoksing.
Ang balor P200 milyones nga dome andam na usab ngadto sa mga negosyanteng buot mobubo og puhonan palibot sa maong edipisyo diin kompleto na sa mga kahimanan. (BANAT NEWS)