CEBU, Philippines - Mayoriya sa mga konsehal sa siyudad sa Sugbo ang motambong sa State of the City Address ni Mayor Michael Rama karong hapon sa Plaza Sugbo.
Gipadayag ni Bise Mayor Joy Augustus Young nga nagtigom sila sa mga konsehal niadtong Miyerkules ug ilang nahukman nga motambong sa SOCA.
Kahinumduman nga mipadayag si Young sa miaging adlaw nga dili siya interesado nga motambong apan nausab na kini karon sanglit usa man kini ka opisyal nga kalihukan nga angayan tambongan sa mga opisyales sa siyudad.
Apan duna hinuoy pipila ka mga konsehal ang dili katambong gumikan kay na-conflict ang ilang eskedyul sama ni Konsehal Jun Pe nga dunay tambongan nga kalihukan didto sa kaulohan, samtang si Konsehal Margarita Osmeña moduaw sa nasakit niya nga igsuon.
Si Association of Barangay Councils (ABC) President Michael Ralota mipadayag nga duna sad siya’y tambongan nga importanteng kalihukan apan iyang paningkamotan nga makaapas sa SOCA.
Gituohang magbaha usab karon ang mga konstituwente sa siyudad sa Plaza Sugbo diin ang ubang grupo niini ang mi-request og bus aron lang gyud makapamati sa mensahe sa mayor. Samtang si Rama miklaro nga wala’y hakot nga mahitabo karong hapon ug desisyon sa nagkadaiyang asosasyon nga nagbase sa siyudad ang pag-request og bus sa siyudadd.
Subling gitataw sa mayor nga haom kaayo ang Plaza Sugbo alang sa iyang SOCA aron daghan ang makapamati niini.
Gitakda usab nga motambong karong adlawa si Gobernador Gwendolyn Garcia ug uban pa nga mga sakop sa Regional Development Council.
Iyagyag ni Rama karong hapon ang iyang nahimo sulod sa usa ka tuig niya nga paglingkod isip mayor ug iya usab nga ipalanog ang umaabot niyang mga programa alang sa katawhan. - BANAT NEWS