CEBU, Philippines - Napaig ang usa ka 36-anyos nga lalaki human kini gituohang nagpakamatay pinaagi sa pagsunog sa iyang kaugalingon sa sulod sa ilang pinuy-anan sa barangay Greenhills sa lungsod sa San Fernando niadtong Lunes sa alas 10:00 sa buntag.
Ang napalgang napaig na ang lawas mao si Vicente Quintano Villabar, 36, molupyo sa maong lugar kinsa nag-inusara sa maong balay nianang pagkahitaboa.
Matud ni PO1 Janel Segura sa San Fernando Police dihang nahinabi sa Banat News subay sa imbestigasyon, ang biktima paingon na untang magluto niadtong higayuna dihang aksidente nga misilaob ang gigamit niining LPG ug maoy nakaingon sa pagkapaso niini ug namatay.
Hinuon wala makaangkon og dakung kadaut ang panimalay niini gawas lang sa biktima nga maayong pagkapaig.
Apan gibutyag ni FO1 Gil Missiona sa San Fernando Fire Station dihang nahinabi sa Banat News nga kadudahan kaayo ang pagkamatay niini ug nagtuo silang tinuyo ang pagpakamatay ni Villabar.
Kini tungod kay sa ilang pagsusi naggakos pa ang napaig nga patay’ng lawas niini sa misilaob nga tangke sa liquefied petroleum gas (LPG).
Dugang nahipos nga impormasiyon sa kabomberohan matud ni Missiona nianang pagkagabii nangayo na kini og pisi ug gihulagway sa mga silingan nga daw adunay dakong problema.
Matud pa nakahigayon lang kini niadtong higayuna pagpakamatay human molakaw ang iyang asawa ug nag-inusara lang kini sa balay.
Gibana-banang P1 ka libo lang ang danyos tungod kay wala man kini mokaylap sa sawog ug sa bungbong bisan ginama ang balay sa light materials. (BANAT NEWS)