CEBU, Philippines - Human mahagbong ang usa ka V-hire nga sakyanan didto sa Transcentral highway sa barangay Babag-2 ning dakbayan sa Sugbo sa milabay’ng hapon, ang Land Transportation Office LTO-7 gusto na usab nga ipaubos sa surprise drug testing ang tanang drayber sa V-hire dinhi sa Sugbo.
Si LTO-7 Regional Director Raul Aguillus nakahuna-huna nga i-apil sa nagpadayon nilang roadside drug testing ang tanang drayber sa V-hire aron pagpitol niadtong mga drayber nga tiggamitan og gidiling drugas nga maoy usa sa hinungdan sa disgrasya sa kadalanan.
Matud sa director nga maoy ilang plano nga molusad og laing hugna sa roadside drug testing sa mga rota sa V-hire aron pagtino sa mga drayber niini kun wala ba magumon sa gidiling drugas.
Hinuon dugang sa director nga sa pagkakarun gipaabot pa niya nga makadawat og kopya sa report sa traffic group kabahin sa pagkahagbong sa V-hire didto sa Babag-2.
Kini human makadawat og report ang director nga nakatulog ang drayber nga si Rustom Tundag samtang nagpadagan sa sakyanan gikan sa Terminal sa lungsod sa Balamban paingon unta dinhi sa dakbayan sa Sugbo apan wala makalahos sa iyang destinasyon kay nahagbong kini didto sa Babag 2, diin 15 ka mga pasahero ang naangol lakip na ang drayber.
Dugang pa sa director nga mag-atubang og sumbong nga reckless driving ang maong drayber ilabina kun masuta ang tinuod kalabot sa giingong nakatulog kini samtang nagmaneho.
Nasayran nga ubay -ubay nga mga drayber sa PUJ ug drayber sa taxi dinhi sa Sugbo ang positibo sa paggamit og gidiling drugas atol sa sunod- sunod nga roadside drug testing nga gilusad sa milabay’ng adlaw.
Hinuon ang napulo ka mga ngalan sa drayber sa PUJ ug taxi nga positibo sa paggamit og ginadiling drugas giduso pa alang sa confirmatory test didto sa kaulohan ug kun masutang positibo mibahad ang director nga tangtangan og linsensya ug ipaubos sa rehabilitasyon ug paabton pa ug unom ka bulan una makalukat og balik. - BANAT NEWS