CEBU, Philippines - Gikuwestiyon ni Gobernador Gwendolyn Garcia ang lakang ni Cebu City South District Congressman Tomas Osmeña sa paggama og sementeryo sa Osmeña Shrine sa barangay Kalunasan ning siyudad sa Sugbo.
Matud pa sa gobernador nga ang maong plano wala mahasubay sa tukmang katuyoan sa pagdonar sa kagamhanan sa lalawigan sa Sugbo sa maong lote ngadto na sa siyudad sa Sugbo pipila na ka dekada ang nakalabay.
Si Gobernador Garcia nga mibasa sa papeles sa pagdonar sa lalawigan sa maong lote ngadto sa siyudad nagkanayon nga dakong kalapasan sa kasabotan ang gihimo sa kanhi mayor tungod kay ang maong lote angay lamang gamiton alang sa mga parke ug uban pang mga public development ug dili alang sa usa ka pribadong interes.
Dugang pa sa gobernador nga may tulubagon ang kanhi mayor sa gikareport nga pag-donate sa Osmeña Shrine ngadto sa usa ka relihiyusong organisasyon kay nahimo ang maong donasyon niadtong nagsingabot ang election nga tataw kaayo nga matawag nga usa ka election offense.
Sa nasayran nga nalatid sa compromise agreement tali sa dakbayan sa Sugbo ug lalawigan sa Sugbo nga ang maong lote gamiton lamang alang sa pampublikong kagamitan sukwahi sa gihimo nga Osmeña Shrine nga gigamit alang sa pribadong katuyoan. (WC)(BANAT NEWS)