CEBU, Philippines - Mipabati og kasagmuyo ang tagdumala sa Rough Rider’s Inc. gumikan sa pagtawag og “Killer Bus” sa usa sa mga sakyanan niining nakahinagbo og aksidente sa kadalanan didto sa sitio Sta. Cruz, barangay Curva, lungsod sa Medellin niadtong ikaduhang semana sa Hunyo ning tuiga.
Sa suwat nga gipetsahan og Hunyo 14, 2011, alang sa Banat News gipasabot ni Manlalaban Cornelio R. Lavente ang kasakit nga gibati sa Presidente ug General Manager sa Rough Rider’s Inc. nga si William L. Tiu bahin sa maong balita.
Matud pa ni Manlalaban Lavente nga ang nahitabo usa ka aksidente ug busa dili angayang tawgon nga killer bus ang ilang sakyanan kay makapaidlas ug makapahadlok kini sa katawhan gikan sa pagsakay sa ilang sakyanan.
Ang disgrasya nahitabo niadtong Hunyo 6, 2011 sa hapon dihang nadasmagan sa usa sa mga bus pasaheroan sa Rough Riders ang duha ka tawong nagsakay og motorsiklo didto sa nahisgutang lugar diin namatay ang back rider niini samtang naangol ang nagmaneho sa maong motorsiklo.
Gumikan niini dili na gusto ang tagdumala sa maong kompaniya nga tawgon pa og killer bus ang ilang sakyanan. (BANAT NEWS)