CEBU, Philippines - Usa ka bana kinsa giaway sa iyang asawa gumikan kay kaadlawon nang miuli kagahapon sa ilang balay nga hubog, naghikog sulod sa ilang pinuy-anan sa sitio Holy Spirit, sa barangay Inayawan , siyudad sa Sugbo ug alas 6:00 na sa buntag kagahapon mapalging patay na.
Ang naghikog giila sa kapolisan nga mao si Danny Fernandez, 30, company driver sa Suntrade Marketing.
Si PO3 Ruth Violango usa sa mga imbestigador sa Homicide Section sa Cebu City Police Office (CCPO) nga nahinabi sa Banat News nagkanayon nga si Sheree Ann Fernandez ang asawa sa naghikog mitug-an kanila nga alas-3:00 kagahapon sa kaadlawon miuli iyang bana nga nakainom, busa iya kining giaway.
Apan matud ni Violango nga sa tantong away sa magtiayon si Danny mikuha og pisi busa gibadlong kini sa asawa apan wala kini mopatuo ug hinuon gimandoan ang asawa nga pasudlon sa ilang kuwarto
Kagahapon alas 6:00 sa buntag nakugang nalang ang mahuyang nga igsuon ni Sheree Ann dihang maoy nabangungatan sa iyang panan-aw ang nagbitay nga si Danny sa sala sa ilang balay kansang pikas tumoy sa pisi nga gihikot sa iyang liog gigaid sa sagbayan sa ilang balay.
Midugang si Sheree Ann nga makadaghan nang higayon nga mihulga ang iyang bana nga magpakamatay pinaagi sa paggamit og pusil nga idul-it ang sumbohan sa iyang tampihak apan dili kabliton ang gatilyo niini. Matud ni Violango nga usa usab sa ilang gitan-aw karon ang dakong kaguol ni Danny sa iyang pagkatangtang sa trabaho ilabi na nga may tulo kini ka anak.
Hinuon gimando sa kapolisan nga ikapa-autopsy ang patay’ng lawas ni Danny aron masigurong walay foul play ang iyang kamatayon. (WC)(BANAT NEWS)