CEBU, Philippines - Napalgang patay sa usa ka kalibonan ang usa ka 17-anyos nga dalagita nga giingong amang ug gituohang gilugos una pa patya sa wala pa mailhing mga gikatahapan diha sa Masulog Center sa sitio Suba, barangay Basak, dakbayan sa Lapulapu kagahapon.
Ang biktima mao si Cheramea Gitgano, taga Fine Tree, Sogod, ug temporaryong nagpuyo sa panimalay sa iyang iyaan nga nahimutang sa nahisgutang dakbayan.
Si Inspector Zenaido Pastorfide sa Homicide Section sa kapolisan sa maong dakbayan nga nahinabi sa Banat News miingon nga gitug-an sa mga kabanay nga niadtong Sabado pa sa gabii nga nawagtang ang biktima.
Gitug-an sa mga barkada nga nakig-inom pa kini kanila sayo sa gabii kuyog sa mga batan-ong mga silingan ug pagkahuman nangadto sila sa disko sa ilang kapilya.
Si Pastorfide miingon nga ang mga barkada nga ilang gisukitsukit mitug-an nga migawas sa diskohan ang biktima aron pagtuman sa sugo sa lawas apan wala na kini mabalik.
Nianang pagkabuntag na midangop ang mga kabanay sa biktima sa barangay hall. Nianang pagka alas-2 sa hapon usa ka Jerry Rondina nga mitubag sa sugo sa lawas ang nakadiskubre sa patay’ng lawas sa biktima.
Matud pa nga nahibulong si Rondina sa kagrabe sa langsa kaayong baho maong iyaha kining gisubay ug nakugang nalang nga may patay’ng babaye nga nahubo na ang panty sa kalibunan ug kabatuhan.
Si Pastorfide miingon nga maayong pagkagusbat sa nawong sa biktima nga maoy gidudahan nilang nakaingon sa kamatayon niini.
Dako usab ang iyang katahap nga gilugos gyud kini sa wala pa patya tungod kay nahubo na ang panty niini ug nawalis ang sinina ug natabon sa nawong, napalgan usab ang tsinelas niini mga 15- metros gikan sa nahimutangan sa iyang patay’ng lawas.
Giimbestigar na nila ang usa ka tawo nga nagbantay og peryahan sa maong dapit sanglit ang tsinelas nga gipanag-iya sa namatay gisul-ob na man sa anak sa maong magbalantay sa peryahan.
Hinuon nangatarungan ang maong lalaki nga napalgan lamang nila kini.Ang patay’ng lawas gikatakda kagahapon nga i-awtopsiya sa medico legal sa PNP Crime Laboratory. Dunay katahap nga posibleng dili lang usa ka tawo ang mihimo sa maong krimen.(EIM) (BANAT NEWS)