CEBU, Philippines - Usa ka disco dancer nga mipakita og abilidad sa pagsayaw giluba og gunting angol sulod sa diskohan atol sa kasaulogan sa piyesta sa barangay Agus, dakbayan sa Lapulapu sa miaging gabii.
Ang biktima mao si Adrian Arong, 20, ulitawo nga nagpuyo sa maong dapit ug giila lamang sa kapolisan ang suspetsado nga usa ka Raprap nga giingong nagpuyo sa laing barangay sa maong dakbayan.
Si PO2 John Carlo Jocotan sa homicide section sa kapolisan sa maong dakbayan miingon nga nalingaw na unta kaayo ang biktima sa iyang pagsayaw sa disco uban sa mga batan-on usab sa maong dapit.
Dihang kalit nga mitumaw ang suspetsado ug gidunggab sa gunting ang dughan sa biktima dayong dagan pahilayo sa maong dapit. Gialarma sa mga barangay tanod ang maong hitabo tungod kay nagkaguliyang man sa pagpanagan ang mga tawo nga mitambong sa gihimong disco. (BANAT NEWS)