CEBU, Philippines - Moabot og dos mil ka kilong mga isda ang nasakmit sa mga sakop sa Bantay Dagat ug kapulisan gikan sa usa ka panagatang giingong ilegal nga nangisda sa kadagatan sa lungsod sa San Remegio niadtong milabay’ng sayo sa buntag. Ang gidakop mao ang Fishing Boat CA Queen Joy nga gipanag-iya sa usa ka Diosdado Ursal, molupyo sa barangay Hagnaya sa maong lungsod.
Matud ni PO3 Felipe Gamzael Mandal sa San Remegio Police Station dihang nahinabi sa Banat News, 17 ka tripulante ang nasikop nga gipangulohan sa boat captain nga si Roger Forrosueplo, 46, taga barangay Bawod, Bantayan ug engine master nga si Manuel Arsolon.
Si Mandal nagkanayon nga ang mga sakop sa Bantay Dagat nakadawat og report kabahin sa panagatan nga ilegal nga nangisda gamit ang usa ka matang sa pukot nga gitawag og ‘zipper’ sa maong lugar hinungdan nga dali silang miresponde.
Didto nasakpan gyud sa akto ang maong panagatan nga ilegal nga nangisda gamit ang maong pukot, apil sa nasakmit ang gibanabanang 2,000 ka kilong lain laing klase sa isda.
Sa paghimo ning balita gi-hold ang maong panagatan ug mga gamit sama sa pukot samtang gibilanggo ang mga tripulante samtang gihikay pa ang multa sa kalapasan nga ilang nahimo. (BANAT NEWS)