CEBU, Philippines - Ipasusi ni Kapitan Michael Gacasan sa barangay Guadalupe ang dalan sa Banawa nga gireklamo sa mga molupyo tungod kay gihimo na kining parkingan, diskargahanan, basketbolan ug hayaan sa minatay hinungdan nga nakapalisod og maayo sa mga residente.
Ang maong dalan nga gireklamo mao ang 968 V. Rama Extension sa maong barangay.
Kahinumduman nga usa ka concerned citizen ang mitaho dinhi sa Banat News sa miaging semana gumikan sa ilang problema nga maglisod na sila og agi sa maong dalan.
Ang mga gireklamo mao nga trak de karga, nga magdiskarga ug magkarga sa mga produkto sa mga negosyanteng nagpuyo sa maong dapit, ang basketbolan, mga barong-barong ug gihimong parkingan sa mga pasaheroan ang maong dalan ini og kagabii ug duna pay haya sa minatay nga matud pa gihimong rason aron butangan og sugalan.
Ipatawag unya ni Gacasan ang mga molupyong nanag-iya og mga sakyanan nga walay garahian sa maong lugar nga nakabalda na sa dalan aron matagaan og solusyon ang problema.
“Hinaot mi nga matagaan na og kasulbaran, kinahanglan kanang mga negosyante diha, kinahanglan nga mo-provide sila og hustong parking space sa ilang mga sakyanan,” matud pa sa concerned citizen.(EIM) (BANAT NEWS)