CEBU, Philippines - Mas gipalapdan pa karon ang pagpangandam ni Gobernador Gwendolyn Garcia inabagan sa mga miyembro sa Mandaue Chamber of Commerce and Industry (MCCI) alang sa pag-host sa lalawigan sa Sugbo sa East Asian Inter-Regional Tourism Forum (EAITOF) karong umaabot nga Septiyembre .
Si Gobernador Garcia nakigtagbo sa mga opisyal sa MCCI sa miaging adlaw alang sa laing hugna sa preparasyon sa EAITOF.
Partikular sa gihisgutan sa maong tigom mao ang subsub nga pag-andam sa tanang mga gikinahanglan sama sa transportasyon sa mga delegado sa EAITOF uban sa chairman sa committee for transportation sa nahisgutang kalihukan nga mao si MCCI President Eric Ng Mendoza.
Matud pa ni Mendoza nga giihap na daan ang mga sakyanan nga maoy pasakyan sa mga delegado nga gikan sa gawas sa nasud nga moabot dinhi sa Sugbo alang sa maong kalihokan.
Gipahibawo ni Mendoza nga ang gobernador buot nga makigtagbo sa mga nag-unang car dealer dinhi sa Sugbo alang sa nahisgutang kalihokan.
Sa nasayran ang lalawigan sa Sugbo maoy moalagad EAITOF kansang mga representante maggikan sa nagkalainlaing nasud sa sidlakang Asia. (BANAT NEWS)