CEBU, Philippines - Usa ka liso og pangisip gipusil sa wala hiilhing kriminal didto sa Sitio Upper Tawog, barangay Valladolid, siyudad sa Carcar sa milabay’ng buntag.
Ang patay’ng lawas ni Dennis Cabanete Lauron, 38, taga Upper sitio Lamakan, sa maong dakbayan didto na hipalgi sa kasagbutan sa nahisgutang lugar .
Si Insp. Reyco Romaguera, deputy chief sa Carcar Police Station mibutyag nga si Natalia Cabanate, inahan sa biktima misugilon kanila nga niadtong Biyernes sa alas 11:00 sa gabii nakaipsot ang biktima gikan sa prisohan sa ilang balay ug misutoy kini og lakaw nga wala hisayri sa iyang pamilya.
Matud pa sa inahan nga kanunay nila kining gipriso sa lawak sa balay kay may deperensya kini sa pangisip unya magpatuyang lang og laag kun makabuhi.
Nakurat nalang sila kay nianang Sabado sa buntag mao nalay nabalitaan nila gikan sa ilang silingan nga si Lita Racho nga patay na ang biktima nga nagbuy-od sa kasagbutang bahin sa Upper Tawog.
Ang mga miresponding mga polis nakadiskobre og duha ka samad pinusilan sa lawas sa biktima nga maoy hinungdan sa kamatayon niini.
Nakapunit usab sila og lumping nga bala sa wala pa matinong kalibre sa armas didto sa crime scene.
Ang kapolisan padayon pa sa ilang imbistigasyon pagtumbok sa mga responsabli sa krimen.(WC) (BANAT NEWS)