CEBU, Philippines - Patay nang nadiskubrihan ang usa ka 80-anyos nga piniriso kinsa wala na makamata gikan sa pagkatulog sulod sa selda niini sa buhatan sa kapolisan sa lungsod sa Daanbantayan niadtong Huwebes sa miaging kaadlawon.
Ang napalgang patay mao si Hospicio Sanchez, 80, minyo, nga taga barangay Tapilon sa maong lungsod nga nag-atubang og kasong pagpanglugos.
Si PO3 Dennis Velez sa Daanbantayan Police Station mibutyag sa Banat News nga ang kaubang piniriso ni Sanchez maoy nakamatikod nga wala na kini magginhawa sa iyang katri hinungdan nga dali nilang gipahibawo ang mga polis.
Daling nagkuha og doctor ang kapolisan ug dihang gisusi ni Dr. Nicomedes Javier Jr., ang municipal health officer sa maong lungsod nasuta nga namatay ang maong piniriso tungod sa Cardiac respiratory arrest.
Ang maong piniriso nabilanggo niadtong tuig 2005 gumikan sa kasong pagpanglugos ug gituohan nga ang pangidaron niini maoy hinungdan sa iyang kamatayon.
Matud ni PO3 Velez wala silay namatikdan sa mga nilabay’ng mga adlaw nga may gipamati ang maong piniriso gumikan kay may regular nga check up sa panglawas ang mga piniriso nila matag semana.
Adunay 59 ka mga piniriso ang kapolisan sa Daanbantayan lakip kang Sanchez sulod sa duha ka silda. - BANAT NEWS