CEBU, Philippines - Patay ang usa ka mahuyang nga beautician human kini pusila sa wala mailhing lalaki nga nag-angkas og motorsiklo niadtong Sabado sa buntag diha sa gawas sa balay niini sa sitio Tabok, barangay Maslog, dakbayan sa Danao.
Ang biktimang si Ronnie Aguilar, 35, nakaangkon og mga samad pinusilan sa lawas wala na makaabot nga buhi ngadto sa Danao City District Hospital.
Si PO2 Marlon Remollo mibutyag nga si Aguilar dunay gitupihan niadtong higayona diha sa gawas sa iyang balay dihang duha ka mga lalaking sakay og usa ka motorsiklo ang mihunong diha sa likod sa balay sa biktima ug ang angkas mikanaog ug dayon gipusil si Aguilar sa likod nga bahin.
Ang mga bala milahos ngadto sa iyang dughan ug tiyan.
Si Remollo nagkanayon nga duna sila’y katahap nga dunay kalambigitan sa ginadiling drugas ang pagpatay kang Aguilar sanglit ang naulahi impormante sa kapolisan.
Gikataho nga si Aguilar usa usab ka mogamitay og ginadiling drugas apan maghatagan og mga impormasyon ngadto sa mga polis kung kinsa ang mga big time drug personality sa ilang dapit.
Si Remollo midugang nga duna silay mga nadakpan nga nalambigit sa ginadiling drugas tungod sa mga impormasyong gikan ni Aguilar.
Na-recover sa mga polis diha sa lugar nga nahitaboan ang tulo ka kabhang sa mga bala sa kalibre .45 nga pistola.
Sa laing bahin, patay ang usa ka 24-anyos nga lalaki human kini pusila sa wala mailhing kriminal samtang naglakaw uban sa iyang higala kagahapon sa kadlawon diha sa sitio San Antonio, barangay Linao, dakbayan sa Talisay.
Ang biktima mao si Arnel Segundino, taga sitio Antipolo sa nahisgutang barangay kinsa nakaangkon og samad pinusilan sa nawong ug daling gidala ngadto sa Talisay City District Hospital apan human nakalabay ang usa kapin ka oras nabugtoan kini sa iyang kinabuhi.
Base sa imbestigasyon sa kapolisan nga si Segundino naglakaw uban ni Emmanuel Caparida diha sa lugar nga nahitaboan dihang duha ka mga lalaki kinsa sakay og kolor itom nga motorsiklo kalit lang mitungha ug ang angkas niini kalit nga namusil.
Si Caparida wala maigo sa maong pagpamusil tungod kay dali kining nakadagan pahilayo sa mga kriminal. Ang kapolisan nagpahigayon og follow-up nga imbestigasyon sa maong insidente. - EIM (BANAT NEWS)