CEBU, Philippines - Napalgang naglutaw-lutaw sa dagat ang usa ka mananagat human kini nalumos samtang nanagat niadtong Martes sa kaadlawon sa kadagatan sa sitio San Vicente sa barangay Poblacion sa lungsod sa Daanbatayan.
Si Marcos Oflana, molupyo sa maong lugar napalgang naglutaw-lutaw sa dagat alas-8 sa buntag niadtong Martes.
Segun sa report sa kapulisan sa lungsod sa Daanbantayan nga gipadangat sa Operations Branch sa Cebu Provincial Police Office (CPPO) nga alas-5 pa sa kabuntagon migikan sa ilang balay ang biktima aron managat. Ang iyang ig-agaw nga si Nemesio nga usa usab ka mananagat misaysay sa kapulisan nga niadtong higayona dautan ang tempo sa panahon hinungdan sa kadagko sa balod.
Si Nemesio miingon nga samtang ‘nanubid’ ang iyang ig-agaw nagtuo siya nga posibleng nahulog sa dagat gikan sa iyang baroto hinungdan sa pagkalumos niini.
Ang baroto sa namatay narekober pipila ka kilometros didto na sa barangay Bitoon sa nahisgutang lungsod. (BANATNEWS)