CEBU, Philippines - Gipasidan-an ni Sr. Supt. Melvin Ramon Buenafe, hepe sa Cebu City Police Office nga kutob sa mga polis nga magmagahi sa pag-uli sa ilang mga armas ngadto sa kagamhanan sa dakbayan sa Sugbo mag-atubang og kasong administratiba.
Ang maong pasidaan gihimo ni Buenafe agi og suporta sa pahibawo sa kagamhanan sa dakbayan nga bawion niini ang mga armas de fuego nga giluwat niini ngadto sa mikabat og 20 ka polis ning dakbayan.
Gumikan niini gimandoan dayon ni Buenafe ang iyang supply officer nga makig-alayon sa local nga kagamhanan sa dakbayan sa Sugbo.
Kagahapon sa buntag si PRO-7 Chief Supt. Ager Ontog Jr., personal nga miduaw sa Cebu Provincial Police Office (CPPO) ug CCPO ug gimandoan ang duha ka mga director sa kapolisan ning dakbayan ug lalawigan nga ipauli sa ilang mga sakop nga polis ang armas niini nga iya sa kagamhanan sa dakbayan.
Nalakip ang CPPO sa mando ni Ontog tungod kay adunay mga polis kaniadto nga nadestino sa CCPO nga karon nadestino na sa probinsya.
Si Buenafe nagkanayon nga iyang gihatagan og tagal ang mga hingtungdang polis sa labing dali nga panahon ang pag-uli sa maong mga armas tungod kay imbentaryuhon kini sa City Hall.
Nagtuo si Buenafe nga posibleng mahibalik ra sa mga polis ang maong mga armas kun mahuman na ang City Hall sa pagsusi niini.
Matud ni Buenafe nga mag-atubang og kasong administratiba ang polis nga magmagahi sa pag-uli sa maong armas ngadto sa city hall.
Sa habig ni SPO1 Adonis Dumpit kinsa anaa karon sa bilanggoan tungod sa kaso niining giatubang, miingon si Buenafe nga dili na makadala og armas si Dumpit tungod kay anaa pa man kini sulod sa prisohan busa dili lisud iuli ang iyang armas ngadto sa City Hall.
Hinuon giklaro ni Buenafe nga kining pagpauli sa armas sa iyang mga sakop dili makaapekto sa ilang operasyon sa pagmintinar sa kahusay’g kalinaw dinhi sa dakbayan. (BANAT NEWS)