CEBU, Philippines - Tulo ka mga illegal drug pusher ang nasikop sa kapolisan sa gihingusgan nilang kampanya batok sa ginadiling drugas sa dakbayan sa Mandaue ug Lapulapu sa miaging gabii.
Ang mga suspetsadong nagtingkagol na karon sa prisohan mao sila si Jeswel delos Santos , 21, ulitawo; Eliseo Cumahig, 36, nga pulos molupyo sa Centro Labogon, dakbayan sa Mandaue ug Rufino Malingin Baring, 40; nga taga Mactan, dakbayan sa Lapulapu.
Si delos Santos nasakmitan og usa ka pakiteng shabu, ug buy bust money nga P300, ug si Cumahig kinsa mibabag sa mga otoridad dihang gisikop si delos Santos, giapil sa pagdakop.
Samtang si Baring nasakmitan og 59 ka pakiteng gituohang shabu, cash nga P1,200 nga gituohang halin sa ginadiling drugas ug usa ka .45 kalibreng pistola uban sa mga buhing bala niini.
Ang mga dinakpan dugay nang gipanid-an sa kapolisan bahin sa naandan nilang illegal nga negosyo.
Sa miaging gabii nakahukom ang mga otoridad sa paglusad sa ilang operasyon batok sa mga suspetsado.
Si Police Insp. Wilson Abot, hepe sa Police Station 5 sa Mandaue City Police Office nagkanayon nga padayon nilang gipanid-an karon ang mga badlungon sa ilang hurisdiksyon aron sa paghipos niini.
Mao gihapon kini ang gipahayag ni Chief Insp.Donald Geneston , hepe sa operation section sa Lapulapu City Police Office kinsa nagkanayon nga labi pa nilang gihigpitan ang ilang pagpaniid karon batok sa mga negosyante sa ginadiling drugas.
Ang tulo gipasakaan og kaso nga paglapas sa Akta Republika 9165 kon Comprehensive Dangerous Drugs Act.
Apan si Baring gawas sa kalapasan batok sa nahisgutang balaod, mag-atubang pa usab siya og kaso kalabot sa illegal possession of firearms gumikan sa pagtangkil niya og armas de fuego nga walay lisensya. Ang tulo ka mga suspetsado kasamtangang nagtingkagol sa prisohan. (WC)(BANAT NEWS)