CEBU, Philippines - Usa ka lalaki nga gipasanginlang level 2 drug pusher sa dakbayan sa Danao ang nasikop sa buybust operation kagahapon sa ala 1:45 sa kaadlawon diha mismo sa ilang balay sa dalan Beatriz D. Durano St., sa barangay Poblacion.
Si Darwin Mata Manto alyas ‘Dongwen’ 30, nadakpan sa buybust sa mga sakop sa Provincial Intelligence Branch (PIB) gipangulohan ni PO3 Reynante Solante.
Ang mga ebidensyang nakuha sa kapulisan mao ang usa ka vial sa nubain nga maoy subject sa buy bust ug laing walo pa nga nakuhang susama niini, 24 ka disposable syringes, usa ka .38 revolver dunay lima ka buhing bala, tulo ka .22 magnum revolver diin ang usa niini long barrel nga dunay 12 ka buhing bala, suppressor sa .45 nga kalibre sa armas, usa ka empty magazine sa .45, P700 nga cash gituohan nga halin sa pagpamaligya og nubain.
Si Sr. Insp. Mark Gifter Sucalit, deputy sa PIB mitug-an sa mga tigbalita nga usa ka buwan nilang gipanid-an ang kalihokan ni Manto human sila makadawat og report nga kusog kaayo ang iyang negusyo sa pagpamaligya og nubain.
Si PO3 Solante nangulo sa operasyon mibutyag nga ang sistema sa balay ni Manto kanunay’ng sirado ang balay ug gate niini ug kun adunay mopalit pisliton lang ang doorbell.
Adunay gamay’ng lungag diin molili si Manto sa gate ug diha usab niini itunol ang nubain human madawat ang kwarta.
Giingong mobaligya usab si Manto og minudo nga nubain nga tag P25 ug adto usab mo-inject niini ang mga adik kilid sa iyang balay nga dunay gamay nga payag.
Matud ni Solante nga atol sa buybust operation wala makaugpo si Manto sa dihang nagunitan nila ang kamot niini human gitunol sa lungag sa gate ang usa ka vial sa nubain nga ilang gipalit.
Si Manto nga nahinabi sa mga tigbalita walay lipud-lipod nga miangkong taud-taod na siyang namaligya og nubain apan usahay mag-undang-undang siya sa maong negusyo.
Niadto Enero siya mibalik og pamaligya niini human siya mailad sa usa ka agency didto sa Manila sa miaging tuig sa iyang pagpangaplay og trabaho isip backhoe operator sa gawas sa nasud maong misulod siya sa maong matang sa panginabuhian aron ipakaon sa iyang pamilya.
Iya hinuong gihimakak nga iya ang maong armas sanglit giprenda lang sa iyaha og P300 ning bag-ohay lamang.
Matud ni Solante kinarton nga nubain ang komprahon ni Manto diha sa barangay Kamagayan sa dakbayan sa Sugbu matag semana. (BANAT NEWS)