CEBU, Philippines - Usa patay samtang laing duha niini ang anaa karun sa talandugon ang kahimtang human sa nahitabong aksidente pasado alas-9 sa miaging gabii sa barangay Bagacay lungsod sa Sibonga.
Ang namatay nailhan nga si Nicanor Mondido, 31, taga barangay Bahay sa maong lungsod samtang ang samaran mao silang Arnel Rivera, 28 molupyo sa syudad sa Talisay ug Jonathan Motante, 34, molupyo sa barangay Napo sa siyudad sa Carcar.
Sa pakighinabi sa Banat News ni SPO4 Rodelito Carillo, mibutyag kini nga ang duha ka biktima pulos nagmaneho sa ilang tagsa-tagsa ka mga motorsiklo diin si Mondido patubang sa habagatang bahin samtang si Rivera padulong usab sa syudad sa Sugbo.
Sa diha nga naabot na ang duruha sa nahisgutang lugar giingong kalit nabanggaan ni Rivera ang motorsiklo ni Mondido nga miresulta sa iyang hinanaling kamatayon.
Samtang si Rivera ug ang iyang angkas nga si Motante nalagpot sa dalan nga nakaingon sa ilang pagkaangol.
Ang tulo daling gidala sa South General Hospital sa syudad sa Naga apan si Mondido gideklarar kini nga dead on arrival.
Kasamtangan pa karun nga nagpaayom sa mga samad sa lawas ang driver sa motorsiklo nga nakabangga ni Mondido. (BANAT NEWS)