CEBU, Philippines - Tulo ka bata ang nahanaw ang mga pangandoy human mangamatay atol sa bisperas ug sa mismong adlaw sa pagbukas sa klase kagahapon dinhi sa Sugbu.
Sa dakbayan sa Carcar duha ka magsuon ang wala na makatungha sa ilang klase kagahapon human nangalumos sa usa ka fishpond sa barangay Perrelos sa siyudad sa Carcar niadtong Domingo sa gabii.
Ang nangalumos mao ang magsuon nga James Lloyd Melano, 8, ug manghod nga si Renz Melano,6. Si James gikatakda untang mosulod sa grade 2 samtang grade-1 usab si Renz.
Matud ni PO2 Alex Buanghog sa Carcar City Police dihang nahinabi sa Banat News, subay sa imbestigasyon nila ni Insp. Reyco Romaguera ang amahan sa mga bata nga si Adonis Alfa, 34, maoy caretaker sa fishpond diin malumos ang mga bata.
Si Alfa mitug-an sa mga imbestigador nga alas 2:00 nianang pagkahapon mibiya siya sa balay kauban ang inahan sa mga bata aron mamalit og mga gamit sa mga anak sama sa notebooks ug uban pa.
Kini aron unta magamit sa mga anak sa subling pagbukas sa klase kagahapong adlawa.
Apan dihang nahibalik na silang duha sa kapuyo nianang pagka-alas 6:00 sa hapon dala ang mga kinumpra nga notebooks ug papel wala na diha sa balay ang mga bata hinungdan nga dali niya kining gipangita.
Daling gisusi sa amahan ang gibantayan niining fishpond nga nahimutang dili layo sa ilang pinuy-an tungod kay kanunay man niining mabantayan ang mga anak nga anha magduwa ug maligo.
Daw napusdakan sa langit si Alfa dihang nakit-an ang mga anak nga naglutaw sa maong fishpond nga wala na maglihok hinungdan nga dali siyang milayat sa tubig ug gikuha ang mga wala nay panimuot nga mga anak.
Gisuwayan pa unta sa kapulisan og tabang ang mga bata ug gidala sa Carcar District Hospital apan gideklarar sila nga patay na.
Base sa imbestigasyon sa mga polis, posibleng miuna og ambak ang manghod apan gumikan kay dili makamaong mulangoy posibleng nagpakitabang kini sa maguwang kinsa dali usab nga miresponde apan dili gihapon makamaong mulangoy hinungdan nga silang duha nag-unong og kalumos.
Matud pa sa amahan sa mga bata nga karong wala nay mogamit sa ilang gipamalit nga mga school supplies ilaha nalang kini ipaapil sa ilang paglubong.
Samtang sa lungsod sa Medellin, usa ka 7-anyos nga batang babaye ug tinun-an sa grade one ang namatay human mapunggit sa sakyanan nga gimaneho og kawani sa gobiyerno samtang paingon na unta kining molabang aron mosulod sa tunghaan kagahapon sa buntag diha sa provincial road sa barangay Lamintak Sur sa lungsod sa Medellin.
Ang biktima giila sa kapulisan nga mao si Danica dela Peña kinsa mosulod unta sa klase sa Antonio Pantaleon Elementary School apan nadasmagan ug naguyod og gibana-banang tunga sa kilometro gikan dapit siya madasmagi sa drayber sa jeep nga si Felimon Sotto, 56, nga taga barangay Poblacion.
Si Sotto nga kapatas sa Department of Public Works and Highways (DPWH) nga nagbase sa lungsod sa Medellin ug maoy nagmaneho sa service vehicle nga nagtangag sa plakang DHB-291.
Si PO2 Roland Ruben sa Medellin Police Station nagkanayon nga si Sotto napakyas pagtunob sa brake sa dihang ang biktima milabang sa karsada maong iya gyud kining naligsan.
Sigun sa mga nakasaksi sa hitabo si Sotto hinay nga nagpadagan niadtong higayona apan sa dihang iyang naligsan ang bata kalit kining mipakusog og padagan ug diha na siya mihunong human siya gigukod sa mga residente sa dapit.
“Nabagnos gyud iyang nawong hasta ang ulo nakita na iyang bagol-bagol,” matud pang PO2 Ruben.
Si Sotto boluntaryong mitahan human sa aksidente ug kasamtangan karung gitanggong sulod sa karsel sa Medellin Police Station human siya gipasakaan og kasong reckless imprudence resulting in homicide kagahapon sa hapon diha sa Regional Trial Court sa dakbayan sa Bogo.(EIM) (BANAT NEWS)