CEBU, Philippines - Giangkon ni Cordova Mayor Adelino Sitoy nga inutil gyud ang kapulisan sa ilang lungsod ug wala silay mahimo pagsumpo sa suliran sa cyber sex sa ilang lugar nga gika-report nga mikuyanap na karun sa ilang lugar.
Sa interbyu sa DyDD kang Sitoy kagahapon midayeg kini sa gihimo sa mga sakop sa National Bureau of Investigation (NBI) inabagan sa United States Department of Homeland Security nga maoy nakasikop sa magtiayon diha sa ilang lungsod nga nag-negosyo og cyber sex gamit ang unom nila ka mga babayeng minor de edad diin lima niini ilaha rang mga anak nga nagpangidatrun palang og 15,13,11,9,7 ug 4-anyos.
Giangkon sa mayor nga daghan na kaayo sila og mga report kabahin sa cyber sex kon pagpahubo sa mga minor de edad atubangan sa camera nga naka-online sa mga langyaw nga kustomer pinaagi sa internet apan wala silay nahimo pagsumpo niini.
Usa sa gitumbok ni Sitoy nga hinungdan mao ang kakuwang sa kagamitan sa kapulisan sa ilang lungsod sama sa intelligence network ug pagkuha og search warrant gumikan kay sagad himuon ang negosyo sa cyber sex diha sulod sa mga panimalay.
Matud sa mayor way laing makasulbad niini mao ra gyud ang nasudnong kagamhanan nga maoy naghatag og permiso sa operasyon sa internet nga pagkakarun gi-abusohan na og maayo.
Apan si Insp. Jonas Tajanlangit, ang deputy police chief sa Cordova sa pakighinabi sa Banat News nagkanayon nga wala sila magmika kalabot sa maong nabaniog nga cyber sex dens sa ilang lungsod.
Matud pa ni Tajanlangit sa wala pa mahitabo ang pagpangronda sa NBI aduna na silay on-going surveillance sa laing pamilya nga nalambigit gihapon sa susamang krimen ug gikatakda na nila untang aplayan og search warrant.
Ang ‘subject’ sa ilang surveillance sa sinugdanan palang aduna nay koordinasyon sa Children’s Legal Bureau.
Gidepensahan ni Tajanlangit ang ilang kwerpo sa pag-ingon nga sukwahi sa NBI nga adunay kaugalingong mga gamit ug uban pang resources nga makatabang sa ilang operasyon, ang Cordova police nagsalig lang sa ‘mano-manong’ pamaagi. (BANAT NEWS)