CEBU, Philippines - Patay ang usa ka mag-uuma human gitagod og tigbas sa iyang pag-umangkon sa pag-agawan kinsa nangangkong gibaharan sa biktima nga patyon atol sa ilang panaglalis sa imnanan diha sa sitio Upper Calangyawon sa barangay Napu sa dakbayan sa Carcar niadtong Domingo sa gabii.
Si SPO1 Reynaldo Fuentes, ang imbestigador sa maong kaso miila sa namatay mao si Rodrigo Tanuco,48, kinsa nakaangkon og dili momenus siyam ka samad tinigbasan human tigbasa sa pag-umangkong si Renelo Regidor, 31.
Matud pa ni Fuentes sa pakighinabi sa Banat News nga nagkalalis ang duha samtang nakig-inom uban sa ilang paryenteng si Rosalio Mangyao apan miuna og uli ang biktima.
Nagtuo si Fuentes nga posibleng giapas sa suspek ang biktima ug diha-diha gitagod og tigbas.
Ang suspek kinsa unang miikyas mitahan sa barangay kagawad sa ilang barangay ug ang naulahi na maoy midala kaniya ngadto sa Carcar police station kagahapon sa buntag.
“Nag-inom daw ni sila unya naglalis, gibaharan man daw sa namatay nga patyon. Sa kahadlok tingali kay nakapatay na sa una ang namatay iyaha nalang giunhan,” matud pang Fuentes base sa gibutyag sa suspek.
Dugang nakuhang impormasyon ni Fuentes mao nga ang anak sa biktima mibutyag nga nasuko ang biktima sa suspek tungod kay gisuhulan unta kining padaruhon apan gikuha na ang bayad apan wala daroha ang umahan. (BANAT NEWS)