CEBU, Philippines - Andam mohatag ang kagamhanan sa probinsya sa Sugbo og libre nga legal assistance sa mga kababayen-an nga manginahanglan niini pinaagi sa Provincial Women’s Commission (PWC). Mao kini gipasalig ni Bise Gobernador Agnes Magpale atol sa gipahigayon nga “Orientation/ Seminar on Gender Sensitivity and other Gender Responsive Laws” didto sa lungsod sa Sogod sa miaging adlaw.
Ang maong seminar gitambongan sa mga opisyales sa matag barangay lakip na usab ang mga presidente sa nagkadaiyang asosasyon sa kababayen-an sa 18 ka barangay sa maong lungsod. Ang bise gobernador sa Sugbo kinsa maoy pinasidunggang dinapit sa nahisgutang kalihukan miingon nga ang kagamhanan sa lalawigan dili gyud motalikod sa mga kababayen-an nga nabiktima sa mga pagpanagmal ilabina gikan sa ilang mga kabanahan.
Si Magpale kinsa mao usab ang chairman sa Committee on Women and Children Welfare sa hunta probinsiyal nagkanayon nga ubay-ubay na sa mga kababayen-an ang nakapahimulos sa mga programa sa Kapitolyo.
Dugang pa ni Magpale nga ang pangagamhanan karon ni Gobernador Gwendolyn Garcia naghatag og kasiguroan nga maprotektahan ang mga babaye ilabina sa nanginahanglan og legal assistance sa ilang pagpakigbisog batok sa nagdagmal kanila.
Samtang si Cleofe Maningo, ang tigpamaba sa Municipal Social Welfare and Development Office ( MSWDO), nagkanayon nga malipayon kaayo ang taga Sogod tungod kay wala sila pasagdi sa probinsya sa dihang nangayo sila og suporta para sa maong kalihukan. Si Maningo nagkanayon nga ang maong orientation dako kaayo og tabang ngadto sa mga opisyales sa barangay nga bag-o pa sa ilang serbisyo lakip na usab sa mga lumulupyo niini. (BANAT NEWS)