CEBU, Philippines - Sa labing unang higayon ang kontrobersyal nga sinagop ni Mayor Socrates Fernandez sa dakbayan sa Talisay nga si Joavan Fernandez miatubang sa daghang sakop sa media nga walay reklamong giatubang kagahapon human sa pagtambong niini sa Santos nga Misa sa Santa Teresa de Avila Parish sa barangay Poblacion, Talisay.
Si Joavan kinsa dinhi lang sa Banat News kanunay magpa-interbyu nakighugoy-hugoy kagahapon sa mga tigbalita nga kaniadto niyang gihulagway nga himantayon lang sa iyang sayop.
Si Joavan ug amahang mayor uban ni Cebu City Police Director Ramon Melvin Buenafe kinsa maoy midasig kaniya sa pagbag-o nunot sa nagtipun-og nga mga kaso ug kontrobersyang giatubang, nagdungan sa pagtunol sa halad ngadto sa altar atol sa Santos nga Misa.
Human niini si Joavan maabi-abihong miatubang sa media ug mipasalamat sa pag-agni kaniya ni Buenafe.
Si Buenafe sa labing uwahing pagkadakop kang Joavan mimaymay kaniya ug mihagit sa anak sa mayor nga kini magbag-o sanglit taas pa kaayo ang kahigayonang mamahimo kining maayong lider hulip sa amahan.
Si Joavan nga nahinabi sa mga tigbalita nagkanayon nga maghinay-hinay na siya og usab sa iyang kinabuhi apan aduna siya’y pagduha-duha gumikan sa mga bati gihapong mga akusasyon batok kaniya.
Si Buenafe nga nahinabi sa mga tigbalita nagkanayon nga si Joavan dunay purohang mausab ug kinahanglan lang nga dili siya trataron sa publiko nga dautan.
Gibutyag usab sa mayor nga sa pagkakaron nagpailawom si Joavan sa counseling ni Monsignor Romualdo Kintanar ang Padre Kura sa Santa Teresa Avila ug gani mao kini hinungdan nga nauwahi og diyutay sa misa si Joavan tungod sa gitambongang counseling. (BANAT NEWS)