CEBU, Philippines - Nagkurog nga mitaho sa Talisay City Police Station sa barangay Poblacion ang usa ka vendor human kini tulisa sa wala hiilhing lalaki sa sulod sa Nacario Trade Center sa barangay Tabunok, dakbayan sa Talisay niadtong Biyernes sa buntag.
Ang biktima mao si Eugenia Acaso, 47, taga sitio Tiguib, barangay Lagtang sa nahisgutang siyudad ug manindahay og saging sa maong merkado.
Base sa imbestigasyon sa kapolisan nasayran nga ang tulisan nagsul-ob og camouflage nga jacket ug nag -short pants, nag-helmet ug nag-antiyuhos ug miduol kini sa biktima uban sa gition niyang armas ug mideklarar nga tulis.
Dayon gilabni sa maong tulisan ang beltbag sa biktima nga may sulod nga cellphone nober, mga resibo ug kwarta nga P5,500.
Unya mibiya kini sakay sa iyang motorsiklo nga walay plaka ug padayong gipangita karon sa kapolisan. (BANAT NEWS)