CEBU, Philippines - Tulo ang patay duha niini mga babaye lakip na ang drayber sa motorsiklo nga walay helmet dihang ang motorsiklong ilang gisakyan nadasmag sa nag-parking nga cargo truck didto sa national highway sa barangay Tungkop lungsod sa Minglanilla kagahapon sa alas 2:00 sa kaadlawon.
Ang mga biktima mao si Bernard Bacus, 23, ulitawo ug Cristylyn Aledon, 25, dalaga, nga pulos taga barangay Tunghaan, ug Aimme Savellita, hingkod, nga taga barangay Tungkop, tanan sa maong lungsod.
Samtang ang ilang gidasmagan mao ang cargo truck nga may plaka nga GXJ 974 nga gimaneho ni Jiffy Abadiez, hingkod, nga taga Tungkop kinsa mi-parking sa maong sakyanan kay nag-ilis pa og senina sa ilang balay.
Si PO2 Abelardo Beton sa Minglanilla Police Station mibutyag sa Banat News nga ang mga biktima paingon sa siyudad sa Sugbo dihang nakigginukdanay kini sa laing motorsiklo ug pag-abot sa lugar nga giparkingan sa trak de karga gituohang wala na kaklaro ang drayber sa maong trak nga nagpundo hinungdan nga wala na kini makakontrol sa iyang sakyanan ug midiretso pagdaro sa likod niini.
Ang drayber kinsa walay helmet maayong pagkaparok ang ulo sa likod sa de karga nga maoy nakaingon sa pagkabuak niini, samtang ang duha ka dalaga nga sakay sa likod sa maong motorsiklo nangalagpot ug mitugpa sa sementadong karsada nga maoy hinungdan sa hinanali nilang kamatayon.
Samtang ang drayber sa cargo truck kasamtangang gisukit-sukit sa kapulisan ug gi-hold ang lisensiya niini alang sa dugang imbistigasiyon sa maong panghitabo.
Gisuta pa sa kapolisan kun may parking light ba ang maong sakyanan ug diha ba kini sa tukmang lugar nga angay kaparkingan sa iyang trak.(WC)(FREEMAN)