CEBU, Philippines - Usa ka mananagat nga dili kaantigo molangoy nalumos didto sa kadagatan sa sitio Bakay, barangay Tulay, lungsod sa Minglanilla sa miaging udto.
Ang biktima mao si Melchor Carba, 42, nga taga sitio Tres de Mayo, barangay Ward 4 sa nahisgutang lungsod.
Sa pakighinabi sa Banat News ni PO3 Alfredo Pagaling, nasayran nga ang biktima uban sa silingan niini nga si Jesus Visañez namukot sa nahisgutang lugar.
Matud pa ni Pagaling nga ang duruha samtang nagbantay sa ilang pukot miubog ngadto sa lawom nga bahin sa dagat.
Apan wala sila makabantay nga didto na sila sa kantil nga bahin sa dagat ug tungod kay dili kaantigo molangoy, dali kaayong mitidlom sa ilawom sa dagat ang biktima.
Gibutyag ni Visañez ngadto sa kapolisan nga gisuwayan niya og sawom aron makuptan niya ang biktima, apan wala na niya kini hiapsi tungod usab sa kakusog sa sulog sa dagat.
Miuli siya ug gipahibawo niya ang asawa niini kinsa nagpakitabang usab dayon sa mga tinugyanan sa Bantay Dagat sa lungsod.
Gisuhid nila ang kadagatan ug niana nang pagka-alas 6:00 sa gabii nila hikit-i ang biktima nga naglutaw na didto sa Palm Beach Resort sa barangay Tungkop sa maong lungsod nga wala nay kinabuhi.
Ang asawa sa biktima mibutyag sa kapolisan nga wala unta siya mosugot dihang nananghid ang biktima kaniya nga mamukot apan mipugos gyud ni paglakaw. (BANATNEWS)