CEBU, Philippines - Talandugon ang kahimtang sa usa ka 28 anyos nga lalaki human kini dunggaba sa iyang bayaw nga lalaki didto sa Purok Rambo, barangay Babag II, dakbayan sa Lapulapu sa miaging gabii.
Ang biktima mao si Christopher Angco, ulitawo, samtang ang suspetsado mao si Geramel Cases, 27, bana sa igsoong babaye sa biktima sa nahisgotang barangay.
Si PO2 John Carlo Jocotan sa homicide section sa kapolisan sa maong dakbayan miingon nga gikabangi na daan sa suspetsado ang iyang bayaw ug naatol usab nga nagkaabot sila sa usa ka hantakan sa maong lugar.
Matud pa ni PO2 Jocotan nga samtang nagpadayon ang ilang hantak wala na usab magkasinabot ang biktima ug ang suspetsado bahin sa ilang pusta.
Gumikan kay daan nang may pagdumot, ang suspetsado kinsa daan nang nagluklok og kutsilyo, kalit nga milanit niini ug walay duha-duhang gihansak ngadto sa nagkadaiyang bahin sa lawas sa biktima.
Dihang nahagba na ang biktima sa yuta, misibat dayon ang suspetsado, samtang ang biktima dali usab nga gihatod ngadto sa Lapulapu District Hospital apan gibalhin kini ngadto sa Vicente Sotto Memorial Medical Center sa dakbayan sa Sugbo. (BANATNEWS)