CEBU, Philippines - Ang kagamhanang lokal sa dakbayan sa Lapulapu ug ang Philippine State College of Aeronautics (PHILSCA) nagtambayayong sa paghatag og skills training program sa mga ginikanan ug mga batan-on nga wala na magtungha sa Barangay Babag, dakbayan sa Lapulapu kagahapon sa buntag.
Matud pa ni Lapulapu City Administrator Theodolo "Teddy" Ybañez nga ang proyekto sa Philsca nga "Community Skills Training Program" nakatabang og dako sa mga ginikanan ug mga batan-on sa barangay Babag.
Kini tungod kay ang nakasalmot sa maong training nakaangkon og igong kahibalo sa upat ka kursong gitagana alang kanila aron makakaplag dayon sila og trabaho.
Lakip sa maong mga kurso mao ang Basic Electronics, Radio Repair, Welding, Basic Electricity ug Computer Literacy.
Gikalipay ni Dr. Bernard Ramirez , presidente sa Philsca ug Rowena Navera ,ang Director sa Extention Program sa Philsca , tungod kay mikabat sa dul-an 200 ang misalmot sa maong pagbansay.
Matud pa ni Dr. Ramirez nga magpadayon ang maong programa sa Philsca sa pagtabang sa mga ginikanan ug mga batan-on nga walay mga trabaho ug wala na usab magtungha aron nga makabaton sila og igong kasayoran sa natad sa panarbaho .
Nasayran usab nga sa ubang bahin sa Pilipinas nga nahimutangan sa Philsca daghan nang nakasulod og maayong trabaho sa mga dagkong kompaniya gumikan sa maayong pagbansay nga gitanyag sa maong ahensya.
Samtang gipasalamatan usab ni Kapitan Elias Berdin, konsehal Cecilio Celera ug mga kaubanang opisyal sa Barangay Babag ang Philsca ug si Mayor Paz Radaza sa pagpili sa ilang barangay nga maoy gipahigayonan sa Community Skills Training Program nga gipasiugdahan sa maong tunghaan.
Si Dr. Nonadel Soriano ang Campus Director sa Philsca Mactan Benito Ebuen Air Base mipadayag nga andam pa gihapon sila nga modawat kutob nalang karong adlawa sa mga residente sa Brgy. Babag nga buot mosalmot sa maong programa ug magparehistro sa Babag Barangay Hall aron kasugdan dayon ang ilang training.
Matud pa ni Dr. Soriano nga isunod nila ang lungsod sa Cordova ug Isla sa Olango sa maong bansay-bansay. (BANATNEWS)