CEBU, Philippines - Mopahigayon og linaing imbestigasyon ang hepe sa Tudela Police Station kalabot sa nahitabo kang PO2 Antonio Icalina niadtong Sabado nga napusilan sa dapit nga diin naghitak ang ilegal nga drugas.
Matud pa ni Inspector Edward Sanchez ang hepe sa Tudela Police nga nahinabi sa The Freeman/Banat News nga mopahigayon sila og laing imbestigasyon kun nganung naabot si Icalina sa known-drug infested area sa barangay Langtad syudad sa Naga. “Akong ipa-imbestigar kung unsay nabuhat niya ngadto nganung giingon ana siya,” pasabot pa ni Sanchez.
Midugang si Sanchez nga mohangyo usab siya kang Cebu Provincial Police Office director Patrocinio Comendador nga parelibo una si Icalina ug ibutang sa provincial headquarters samtang on-going pa ang imbestigasyon.
“Mas maayo ngadto aron kung dunay problema about sa investigation dali ra niya matubag. Usa sad risgo para niya ang pagbiyahi,” matud pa ni Sanchez.
Nasayran nga si Icalina nadestino sa lungsod sa Tudela sukad niadtong buwan sa Enero kini human ang kanhi hepe sa CPPO Sr. Supt. Erson Digal nakadawat og report kalabot sa kalambigitan ni Icalina sa ilegal nga drugas.
Si Icalina pabiling nalandig sa South General Hospital tungod sa samad pinusilan sa duha niya ka paa sa sitio Mohon sa barangay Langtad sa dakbayan sa Naga.
Matud pa sa hepe sa Naga Police nga si Sr. Insp. Rolando Evalle, nga base sa gibutyag ni Icalina lima ka tawo ang mikulata kaniya ug giilog ang iyang service firearm ug maoy gigamit pagpusil sa iyang duha ka tuhod.
Nagpadayon karon ang kapolisan sa pagpangita sa mga gikatahapan ug ang pagbawi sa armas sa maong polis. (BANAT NEWS)