CEBU, Philippines- Ang Trade Union Congress Party (TUCP), usa ka Party-list nga grupo nga nagbase dinhi sa Sugbo misaway sa Visayan Electric Co. (VECO) gumikan sa laraw na usab niini nga mopasaka sa bayranan sa kuryente.
Si Party-list Representative Raymundo Democrito Mendoza sa TUCP nagkanayon nga misang-at na sila og petisyon ngadto sa buhatan sa Energy Regulatory Commission (ERC) aron supakon kining laraw sa Veco atol sa public hearing nga ipahigayon dinhi sa Sugbo sa dili madugay.
Matud pa ni Mendoza nga ang lakang sa Veco usa ka matang sa panaugdaog sa mga kabus nga Sugboanon kinsa nag-antos karon sa kabug-at sa kamahal sa presyo sa mga palitonon nunot sa walay undang nga pagsaka sa presyo sa mga produkto sa petrolyo.
Matud pa ni Mendoza nga ang Aboitiz Power Corp. nga maoy tag-iya sa Veco miburot pag-ayo sa ginansiya niini base sa nakuha nilang record nga mikabat P5.7 bilyones nga limpyong ginansya niini sa tuig 2009.
Sa samang higayon gilatigo usab og saway ni Mendoza ang ERC gumikan sa paghatag niini og higayon sa Veco nga makasang-at og petisyon pinaagi sa gitawag niini nga “performance -based rating-setting” .
Sumala sa press release ni Mendoza nga nadawat sa Banat News, gibutyag niini nga dihang gihatagan sa kongreso og franchise ang Veco, gipasalig sa maong kompaniya nga ihatag nila ang makatarunganong presyo sa kuryente ngadto sa mga Sugbuanon apan wala nila kini tumana, matud pa ni Mendoza.) (BANAT NEWS)